DAGHANG SALAMAT, PRESIDENTE BONGBONG MARCOS !!! Sa ngalan sa Lokal nga Pangagamhanan sa Loon ug sa katawhang Loonanon, nagpasalamat ako sa pangulo sa atong nasud tungod kay, pinaagi sa Philippine Charity Sweepstakes Office (PCSO), nahatagan ang atong lungsod ug bag-ong Patient Transport Vehicle (PTV).
Ang opisyal nga paghatag sa maong sakyanan nahitabo sa usa ka ceremonial handover nga gipahigayon kaniadtong Oktubre 31, 2024 didto sa Quirino Grandstand sa Luneta Park, Manila. Personal natong gidawat ang PTV gikan kang Presidente Marcos ug gipirmahan ang Deed of Donation alang niini. Usa sa mga misaksi sa mahinungdanon ug halandumong kaugmaran mao si Melquiades Robles, ang general manager sa PCSO nga nagsaulog karong tuiga sa ilang ika-90 nga anibersaryo.
Ang bag-ong PTV sa Loon usa ka pasilidad nga makadugang sa kadasig sa atong mga programa sa panglawas, ilabi na sa pag responde sa panahon nga may emergency, sama sa pagkuha ug paghatod sa mga pasyente ngadto ug gikan sa tambalanan, ug ubang mga sitwasyon nga nagkinahanglan og hinanaling pagtagad.
